Данияр Елеусінов: Мен Ұлттық құрамаға қайта оралдым

Рио-де Жанейро олимпиада чемпионы Данияр Елеусінов бокстан Қазақстан ұлттық құрамасына қайта оралды.

Бұл туралы Даниярдың өзі ҚазАқпарат тілшісіне айтып берді. «Мен Ұлттық құрамаға қайта оралдым. Алла қаласа алдағы уақытта бұрынғыдай құрама сапында өнер көрсететін болам. Қазір Астанада отбасыммен бірге демалып жатырмын. Бұйырса дайындықты бастайтын күндерім де алыс емес», — деп атап өтті ол. Сонымен қатар ол алдағы уақыта «қай салмақта өнер көрсетесіз?» деген сұрағымызға да кесімді жауабын берді. «Мен «қазақтың салмағы» атанып кеткен 69 келіде Олимпиада чемпионы атандым. 4-5 жыл осы салмақта өнер көрсеттім. Алдағы уақытта да осы салмақта қала беремін», — деді Данияр Елеусінов. Естеріңізге сала кетейік, Данияр Елеусінов Рио Олимпиадасынан кейін австралиялық MJA Entertainment промоутерлік компаниясымен келісімшарт жасасып, кәсіпқой боксқа ауысқан болатын. Алайда, олар уәдесінен тайып, кейін келісімнен бас тартқаны туралы хабарлағанбыз. Осыдан бірер ай бұрын Данияр Елеусінов тілшімізге сұхбат беріп, Ұлттық құрамаға қайта келуі мүмкін екенін мәлім етті.