Бразилияда есірткі тасымалымен айналысты деген айыппен ұсталған қазақстандық бойжеткен ақталды

Бразилияда осыған дейін есірткі тасымалымен айналысты деген айыппен ұсталған 21 жастағы Славяна Миневская атты қазақстандық бойжеткен ақталды.

Бұл туралы фейсбукте ҚР СІМ баспасөз қызметінің басшысы Әнуар Жайнақов хабарлады. 2017 жылдың 6 ақпанында басталған бұл оқиға желісі бойынша 1996 жылы туған қарағандылық Славяна Миневская Бразилиядан Қарағандыда тұратын әйелге 4 мың доллар үшін гауһар тас бұйымдарын әкеліп беруге келіседі. Бірақ Сан-Паулуға барған кезде оны белгісіз біреулер оқшауланған жерде ұстап, сыртқа шығармай қояды. Тек 2 апта өткенде оған ішінде белгісіз заты бар чемодан беріліп, оны Ереванға жеткізу туралы бұйрық етіледі. Бірақ Сан-Паулу әуежайына жеткенде полиция бойжеткеннің жүгінен 2 келі кокаинды тауып алып, оны сол қаладағы әйелдер түрмесіне жауып қояды. Қазақстан азаматшасының алданған болуы мүмкін екенін ескерген Бразилия билігі Қазақстанның тиісті ведомстволарына оқиғаның анық-қанығын анықтап, бойжеткенді бұл іске жұмсаған қарағандылық әйелді анықтауды сұрайды. Ақыры Қарағандыда отырып, өзгенің қолымен от көсеген 25 жастағы К. атты азаматша ұсталып, істеген қылмысы үшін 6 жыл 8 айға сотталды. Бұл істің құжаттары жедел түрде Сан-Паулу сотына жөнелтілді. Ақыры істің мән-жайына қаныққан Бразилия соты Славяна Миневскаяны ақтады. Қазір азаматша Миневская Сан-Паулуда және жуық арада Қазақстанға қайтып оралатын болады.

24.kz