Жақында қарындасымен дуэт айтып танылған әнші Ринат Шамшырақ үйленді. Әнші әлеуметтік желіге тойындағы беташар рәсімінен видео жариялады. Шаңырақ көтерген әншінің тойындағы беташар рәсімі халықтың сынына қалды. Көпшіліктің айтуынша, бұрын тұрмыста болған келіннің беті ашылмайды, яғни қазақта екінші рет тұрмысқа шыққан әйелдің беташары жасалмайды. Осы тұста халықтың айтқан бұл сөзі қаншалықты дұрыс екенін білу үшін этнограф Болат Бопайұлының пікірін білдік, деп жазды massaget.kz.
Этнографтың айтуынша, беташарды жасау не жасамау тұрмысқа шығатын әйелдің жасына байланысты.
«Беташар деген қазақтың ең маңызды салт-дәстүрінің бірі. Түскен жас келіннің бірінші несібесі деп айта аламыз. Келін жаңа отбасының әрбір мүшесіне деген құрметін көрсетіп, олармен танысатын салт. Егер әйелдің жолдасы қайтыс болып, ол жастайынан жесір қалса, екінші рет тұрмысқа шыққанда егде жаста болмаса, оның беті ашыла береді. Яғни бұрын тұрмыста болған жас келіннің беташары жасалады. Ал егде 50-60 жастағы, балалары ержетіп-бойжетіп қалған әйелдің беті ашылмайды.
Қазіргі кезде тұрмыс құрып, бір-екі жылдан кейін бір баламен ажырасып кететіндер бар ғой, олардың жасы 25-30 аспаса, беташар рәсімі жасалады», — дейді Болат Бопайұлы.
JQ-Aqparat