Басына оқ атты: Маңғыстауда сарбаздың өлімінен кейін әскери прокуратура іс қозғады

Бас әскери прокуратура Маңғыстауда сарбаздың өлімінен  іс қозғап, тергеу бастады.

Бас әскери прокуратура:

«2024 жылғы 7 қыркүйекте сағат 17:10 шамасында Ақтаудағы ҚР ҚМ әскери бөлімдерінің бірінің взвод командирі «Оймаша» полигонының аумағында ПМ табельдік тапаншасынан қатардағы Б-ға оқ атып, сарбаз қайтыс болды. Сол күні Батыс өңірлік әскери-тергеу басқармасы қасақана кісі өлтіру фактісі бойынша сотқа дейінгі тергеуді бастады (ҚК 99-бабының 1-бөлігі)».

Тергеу органы күдіктіні ҚПК-нің 128-бабы тәртібімен ұстады және Ақтау қаласының уақытша ұстау изоляторына қамауға алды.

Қажетті кешенді тергеу амалдары жүргізілуде, қылмыстың себептері мен өзге де мән-жайлар анықталуда. Іс бойынша процестік прокурор тағайындалды. Тергеу барысы Бас әскери прокуратураның ерекше бақылауына алынды. Қылмыстық процестік кодекстің 201-бабына сәйкес басқа мәлімет жарияланбайды, — делінген хабарламада.

Еске салсақ,  бетіне оқ тиіп қаза тапқан сарбаздың әкесі бұл істің жан-жақты текерілуін талап еткен болатын.

JQ-Aqparat