Осы уақытқа дейін әскери салады қызмет жасап, мемлекеттен баспана алмай зейнетке шыққан әскерилерге өтемақы төленеді. Бұл жөнінде бүгін Парламент Мәжілісінің жалпы отырысында Қорғаныс министрінің орынбасары Талғат Мұхтаров айтты, – деп хабарлайды jasqazaq.kz тілшісі.
«Заң жобасы әскери қызметшілердің баспанасыздық проблемасының басқа да түйткілді түйіндерін тарқатуға бағытталған. Бірінші кезекте 20 жыл және одан көп ғұмырын әскери борышты өтеуге арнаған әскери зейнеткерлерді тұрғын үймен қамтамасыз етудің маңызды мәселесі шешімін таппақ. Олардың біразы көшіп кетуге мүмкіндігі болмағандықтан, әлі күнге жабық және оқшауланған әскери қалашықтарда төл баспанасыз қызметтік тұрғын үйлерде өмір сүруге мәжбүр. Әскери зейнеткерлердің тағы бір бөлігі, тіпті ешқандай баспана берусіз қызметтен шығарылған. Бұл ретте заң жобасымен қандай да бір тұрғын үй берілместен, қызметтен шығарылған осы әскери зейнеткерлер біржолғы ақшалай өтемақыны алдағы 2018 жылы алатын болады. Яғни олардың тұрғын үйге деген құқығы толық іске асырылады», – деді Т. Мұхтаров.
Естеріңізге сала кетсек, бүгін Парламент Мәжілісінің жалпы отырысында палата депутаттары «Қазақстан Республикасының кейбір заңнамалық актілеріне тұрғын үй қатынастары мәселелері бойынша өзгерістер мен толықтырулар енгізу туралы» заң жобасымен танысып, мақұлдаған болатын.
Бейбіт Тоқтарбай
Астана
WhatsApp: +7 705 717 9113
