Қазақстандық спортшы Азия чемпионатының финалында жеңісті отандасына берді (видео)

Вьетнамда өткен джиу-джитсудан Азия чемпионатында жұрт күтпеген жағдай болды. Қазақстандық спортшылар жарыстың финалында төбелесуден бас тартты. Жасы үлкен спортшы «жеңімпаз» атанды.

Астананың 22 жастағы тұрғыны Баққуар Хамзе чемпионаттың финалында Ақмола облысының тұрғыны, жерлесі Нұрсұлтан Дүйсенқұловпен кездесіп қалған. Олар бір бапкердің шәкірттері ғана емес, жақсы дос болып шықты. Баққуардың өзі турнирдің екі бөлімі: файтинг және комбат бойынша қатысқан екен. Алғашқысында спортшының жолы болмапты.

«Финалда, өкінішке қарай, өзімнің жерлесім әрі досым Нұрсұлтан Дүйсенқұловпен шықтым. Ол маған жеңісті берді. Біздің бапкерміз ортақ, менен жасы кіші болғандықтан жеңісті күреспей бере салды. Егер алдағы жарыстарда осылай болып жатса, жағдайға қарап көреміз. Бәрі де мүмкін», — деді Хамзе Астанадағы баспасөз конференциясында.

Бұл туралы Baq.kz ақпарат агенттігі sputniknews.kz-ке сілтеме жасап  хабарлайды.