Бүгін Л.Н.Гумилев атындағы Еуразия ұлттық университетінің әскери кафедрасында Кеңес әскерлерінің Ауғанстан аумағынан шығарылғанына 35 жыл толуына орай салтанатты шара болып өтті. Оған әскери кафедраның профессорлық-оқытушы құрамы мен осында білім алған жатқан студенттер – болашақ офицерлер қатысты.
Салтанатты шараның шымылдығын ашқан ЕҰУ әскери кафедрасының басшысы, генерал-майор Еділ Оразов үнемі еліміздің өткен тарихынан тағылым алып, аға ұрпақтың ерлік дәстүріне құрметпен қараудың қажет екенін атап өтті. Бұл өз кезегінде өскелең ұрпақты отансүйгіштік рухта тәрбиелеудің маңызды бөлігі болып табылады деді.
Жалпы алғанда ауған соғысына Кеңес армиясы қатарында 22 000 қазақстандық қатысты. 2 238 күнге созылған соғыста 924 қазақстандық мерт болып, 1015 жауынгер жарақат алды. 22 адам хабар-ошарсыз кетті. Бүгінгі таңда Қазақстанда 10000-ға жуық ауған ардагері бар.
ЕҰУ әскери кафедрасында да отты нүктеден өткен тәжірибелі офицерлер жастарға жан-жақты білім беріп жүр. Олар полковниктер – Ербол Смағұлов пен Хайролла Илиясов. Бүгін генерал-майор Еділ Оразов осынау қос ардагерге бағалы сыйлықтарды табыс етіп, зор денсаулық пен ұзақ ғұмыр тіледі.
Салтанатты шарада сөз сөйлеген студенттер аға ұрраққа алғыс сезімдерін білдіріп, олардың салған даңқты жауынгерлік дәстүрін алға лайықты жалғастырамыз деп сендірді.
Аяжан Айдынқызы,
ЕҰУ әскери кафедрасының студенті