«Ата-анамнан айырған адамдардың қатаң жазалануын сұраймын»

Алматыда күзде болған автобус апатына қатысты қылмыстық іс бойынша сот отырысы өтіп жатыр. Бішімбаев соты сияқты оны да тікелей эфирден көруге болады.

Еске түсірсек, сол апаттың кесірінен үш адам мерт болған еді. Бүгін ата-анасынан қапыда айрылған жәбірленуші автобус жүргізушісінің де кінәлі екенін айтып, айыпталушы Ахметжановтың қатаң жазалануын талап етті.

«Бір күнде әкемнен де анамнан да айрылып қалдым. Мұндайды жауыма да тілемеймін. Ата-анамның өмірден өтуіне себепші болған, оған қатысы бар адамдардың тиесілі жазасын алуын сұраймын. Кеше бейнебақылаудан да көрдік. Сотталушының көпірдің үстінен тоқта деп айтпағанын көрдік. Ол жерде жүргізушінің екі аялдамада есікті ашпай, ақыны төле деп талап еткенін байқауға болады. Бұл жағдайға екі адамның да кінәсі бар. Тергеуші бізге «адвокат жалдамаңдар, барлығы жазасын алады» деді, соған сеніп қалдық. Соттан барлығы әділ шешілгенін қалаймын. Бұл жерде Ахметжанов пен жүргізушінің де кінәсі бар. Мен бұл кісілерді кешіре алмаймын. Сотталушы Ахметжановтың қатаң жазалануын сұраймын, – деді жас жігіт.