Астана әуежайында 2 млн доллардың контрабандалық зергерлік бұйымдары анықталды

Астана әуежайында құны 2 миллион доллар болатын зергерлік бұйымдар контрабандасының жолы кесілді.

«Шұғыл ақпарат бойынша «Нұрсұлтан Назарбаев» халықаралық әуежайында Ыстанбұл-Астана қатынасы халықаралық рейсіне қатысты тексеру жүргізу кезінде Шекара қызметінің әскери қызметшілері ҚР ҰҚК қызметкерлерімен бірге, 1980 жылы туған Әзербайжан азаматының атына жіберілген жүк биркалары бар, салмағы 48 келі болатын екі сөмкені Қазақстан Республикасы аумағына әкелу әрекетінің жолын кесті», — деп хабарлады ведомствоның баспасөз қызметінен. Тексеру барысында сары және сұр түсті қымбат металдан (32 келі сары түсті металл, 16 келі сұр түсті металл) жасалған 11 786 зергерлік бұйым тәркіленді. Контрабанданың болжамды құны 2 млн. АҚШ долларына бағалануда. Қылмыстық іс қозғалып, тергеу шаралары жүріп жатыр.

ҚазАқпарат