Астана тұрғыны Ресей әнұраны жазылған дәптерлердің сатылып жатқанын айтып шағымданды

Астана тұрғыны Айгөлек Жанасылова Ресей әнұраны жазылған оқу дәптерлерінің сатылымда жүргенін айтып шағымданды.

Бұл туралы Айгөлек Жанасылова Фейсбуктағы “Астана хочу похвалить/пожаловаться” тобында жазды.

Әйелдің айтуынша, оқу құралын елордадағы SMALL сауда желісіндегі дүкендердің бірінде сатып жатқан көрінеді.

“Аталмыш өнімнің келесі жолы сатылымға түспеуі үшін жазып отырмын. Бұл жол берілмеуі тиіс нәрсе. Балалар – өздері анализ жасай алмайды, кез-келген ақпаратты сол күйінде қабылдай салады. Менің бес балам бар, мен оларға тиісті деңгейде тәрбие беруім керек. Мектепте бір әнұранды айтады, ал дәптерде басқа әнұран жазылған”, – деп жазады ол.

SMALL сауда желісі аталған ақпараттың тексеріліп жатқанын хабарлады. Астаналықтың шағымы туралы дүкен өкілдері әлеуметтік желі арқылы білген.

Бұл туралы Stan.kz хабарлады.