«Астана» А тобында

Монакода Еуропа лигасының жеребе тарту рәсімі өтіп, Қазақстан чемпионы «Астананың» топтық кезеңдегі қарсыластары анықталды.

Швецияның атақты шабуылшысы Хенрик Ларссонның қатысуымен өткен жеребе тарту рәсімінде «Астана» «А» тобына орналасып, Испанияның «Вильярреал», Израильдің «Маккаби» және Чехияның «Славия» командаларына қарсылас атанды. Байқап отырғандарыңыздай, «Астананың» бұл топтан оза шауып, 1/16-финалға шығатын мүмкіндіктері де бар. Ал сіз қалай ойлайсыз?

Айта кетейік, әу баста «Астана» үшінші себетке орналасқан болатын. Онда да өзімен «себеттес» командалардың ішінде коэффициенті ең жоғарысы болды.

Ал енді қарсыластарымыз жайлы бірер сөз.

«Вильярреал» былтыр Испания чемпионатында 5-шы орынды иемденген. Бұл командамен «Астана» 2014 жылы Еуропа лигасының плей-офф кезеңінде кездескен. Өз алаңымызда 0:3 есебімен жеңіліп, түзде 0:4 есебімен ұтылғанбыз.

«Маккаби Т-А» былтыр Израиль чемпионатында 2-орынға қол жеткізген. Бұлар да Қазақстанға келген. Бірақ, Астанаға емес, Алматыға. Былтыр Еуропа лигасының екінші іріктеу кезеңінде «Қайраттың» жолын кескен осылар. Алматының Орталық стадионында 1:1 есебі тіркеліп, Тель-Авивте 1:2 есебімен ұтылған.

«Славия» – Чехия чемпионатының соңғы чемпионы.
Жалпы, жеребе тарту барысында екі елдің командалары бір топқа түсірмеудің жағдайы қарастырылды. Сондай-ақ, Ресей мен Украина клубтарын да бөлек топтарға жөнелтті. Тағы бір айта кетерлігі, биыл бірінші рет Еуропа лигасының үздік ойыншысы анықталды. Бұл марапат «Манчестер юнайтед» жартылай қорғаушысы Поль Погбаға бұйырғанымен Поль аталмыш шараға қатысқан жоқ.

Ақпарат көзі: Sportsffa.kz