Қанат Исламның келесі қарсыласы соңғы жекпе-жекте шелектен «таяқ жеп» қалған (видео)

9 қыркүйек күні Астанада өтетін бокс кешінде қазақстандық боксшы Қанат Ислам канадалық Брэндон Кукпен жұдырықтасады.

Айта кеткен жөн, Брэндон Кук (18-0, 15 КО) жекпе-жектердің басым бөлігін туған жері — Онтариода өткізген. Соңғы рет ол өзінің жерлесі — Стивен Батлермен кездескен еді. Сол жекпе-жекте Батлер теxникалық нокаутпен жеңілді. Осылайша, Кук IBF тұжырымы бойынша Солтүстік Американың чемпионы атанды. Бұған дейін оның WBA-NABA белбеуі де болған. Дәл осы жекпе-жекте жеңімпаз Кук жарақат алды. Төрешінің теxникалық нокаутқа қатысты шешімімен келіспеген жанкүйерлер рингке сан алуан заттарды лақтыра бастады. Сол кезде біреуі мұзға толы шелекті лақтырды. Ол тура Куктың басына тиді. Айта кетейік, бұған дейін қазақстандық боксшы Қанат Ислам америкалық Джеймс Кирклендке қарсы шығуды жоспарлаған. Ендігі жоспарға сәйкес, Қанат Исламның келесі қарсыласы канадалық Брэндон Кук болады. Бокс кеші кезінде осы уақытқа дейін бірде-бір рет жеңіліп көрмеген сегіз қазақстандық боксшы жұдырықтасады.

 ҚазАқпарат