Америкадан «Роллс Ройс» көлігін әкелуге уәде беріп, ұшты-күйлі жоғалған азамат он жылдан кейін ұсталды. Ол 2014 жылы танысынан 50 млн теңге алып сол күйі хабарсыз кеткен. Жылдар бойы жазадан қашып жүрген күдікті бүгін елге жеткізілді.
Ірі көлемдегі қаржыны қолды еткен азамат осы уақытқа дейін Біріккен Араб Әмірліктерінде бой тасалап жүріпті. «Роллс Ройс» көлігі үшін алған 50 миллион теңгені де жаратып жіберіпті. Еліміздің Бас прокуратурасы 10 жыл бұрын алаяқтық бабымен халықаралық іздеу жарияланған күдіктіні Интерпол агенттігімен бірлесе қолға түсірді. Сыртқы істер министрлігінің көмегімен елге жеткізілген ол енді сот алдында жауап береді.
Бас прокуратураның ресми өкілі Әсел Берқалиеваның айтуынша, әлгі азамат қылмысы үшін 3-7 жылға дейін бас бостандығынан айырылуы мүмкін.
JQ-Aqparat