Алматының орталық мешітінде «Рамазан шатыры» құрылады

Биыл Рамазан айы 11 наурызда басталып, 9 сәуірде аяқталады.

Осыған орай өңірлік коммуникациялар қызметінің алаңында өткен брифингіде Алматының бас имамы Төлеби Оспан алдағы Рамазан айының қалай өтетіні туралы айтып берді.

Бас имамның айтуынша, биыл қаланың 54 мешіттің 50-інде Құран хатым түсіріліп, тарауық намазы оқылады. Алматының орталық мешітінде күн сайын 500 адамға арналған үлкен ауызашар өтетін «Рамазан шатыры» құрылады.

«Ораза айы Наурыз мерекесімен сәйкес келетіндіктен, кешкі ауызашар кезінде мешіт қонақтарына наурыз көже мен бауырсақ таратылады. Ауызашар өтетін орындар қазақы өрнектерімен безендіріліп, Рамазан айының құрметіне «Жарапазан» орындалады», — деді Төлеби Оспан.

JQ-Aqparat