Алматыда Жеңіс күні тойланды

Алматыда Ұлы Жеңістің 79 жылдығы тойланды. Қалыптасқан дәстүр бойынша негізгі мерекелік іс-шаралар 28 гвардияшы-панфиловшылар атындағы саябақта өтті.  Алматы әкімі Ерболат Досаев бастап, Мәңгілік алауға гүл шоқтары қойылды.

Бір минут үнсіздіктен кейін Ұлы Отан соғысының ардагерлері, тыл еңбеккерлері, әскери қызметшілер, құқық қорғау органдарының өкілдері, қоғам қайраткерлері мен қала тұрғындары қаза тапқан қазақстандық жауынгерлерді еске алуға арналған Даңқ мемориалына гүл шоқтарын қойды.

Алматы әкімі майдангерлерді мерекемен құттықтап, ұрыс алаңында және еңбек майданында көрсеткен ерліктері үшін алғыс айтып, зор денсаулық, мол бақыт, амандық тіледі.

Ардагерлер қала басшылығына назар аударғаны үшін ризашылық білдіріп, Алматы тұрғындары мен  қазақстандықтарға бейбітшілік пен жақсылық тіледі.

Сондай-ақ естелік терімен бөлісіп  өлең оқыды  соғыс туралы әндер айтты.

JQ-Aqparat

Суреттер: Алматы әкімінің баспасөз қызметі