Алматыда заңсыз сатылып жатқан 400 келіден астам пиротехникалық өнім тәркіленді.
Қалалық Полиция департаментінің мәліметінше, екі базарда жүргізілген тексеру барысында сертификатсыз, сондай-ақ рұқсат құжаттарынсыз пиротехникалық өнімдерді заңсыз сатудың 9 дерегі анықталды.
«ҚР заңнамасының талаптарын бұзғаны үшін заңсыз бөлшек сауданы ұйымдастырушылар ҚР ӘҚБтК-нің 196-бабы (Тыйым салынған немесе шектелген тауарларды немесе басқа заттарды заңсыз саудалау) бойынша әкімшілік жауапқа тартылды. 400 келіден астам сертификаты жоқ пиротехникалық өнім тәркіленді. Базар әкімшіліктеріне құқықбұзушылық жасауға ықпал ететін жағдайлардың алдын алу бойынша тиісті тапсырмалар берілді», – дейді Алматы қаласы ПД ӘПБ азаматтық және қызметтік қару айналымын бақылау бөлімінің бастығы Айдос Құсайынов.
Жаңа жылды тойлау қарсаңында Алматы полициясы, пиротехникалық бұйымдарды пайдалану кезінде қауіпсіздік шараларын қатаң түрде сақтауға және тұрғындардан сертификатталған пиротехникалық бұйымдарды арнайы бөлінген орындардан сатып алуға кеңес берді.
JQ-Aqparat