Алматыда Д.Баландин атындағы бассейн ашылды

Алматыда әл-Фараби атындағы ҚазҰУ-да «Мәңгілік ел» атты түлектер және студенттер аркасы ашылды. Қаланың 1 000 жылдығы мен ел Тәуелсіздігінің 25 жылдығына арналған шарада Олимпиада чемпионы Дмитрий Баландин атындағы бассейн ашылды.

Салтанатты шараға қала әкімі Бауыржан Байбек, университет ректоры Ғалымқайыр Мұтанов, Олжас Сүлейменов, олимпиада чемпионы Дмитрий Баландин, меценат-бизнесмендер, қоғам қайраткерлері, қала және аудандық әкімдік өкілдері, университет түлектері мен студенттері қатысты.

Арка ҚазҰУ қалашығының кіреберісінде орналасқан.

«Студенттер мен түлектердің триумфальды аркасы «Мәңгілік ел» ұлттық идеясына арналған, ол қаланың белгілі нысандарының біріне, білім рәмізіне айналады. Қазір Алматының спортқа қатысты тіршілігі Универсиадаға әзірлік пен оны өткізу шараларымен тығыз байланысты. Бұл шара да мың жылдық қаланың жарқын оқиғасына айналады деп сенемін, жүзу бассейнін ашу студенттік спорттың дамуына жаңаша серпін береді», — деп атап өтті қала басшысы.

Мерекелік шара -жүзуден тұңғыш Олимпиада чемпионы Дмитрий Баландин атындағы 25 метрлік бассейнді ашумен жалғасты.

Дмитрий жаңа нысанды ашуға қатысты ойын білдірді.

«Мен ҚазҰУ-ға оқуға түскенде мынандай әсемдік болған емес. Арканың ашылуы — маңызды оқиға. Осы шараға мені шақырғанына риза болдым, осындай құрмет көрсетілгені үшін алғыс айтамын. Менің атым берілген бассейн боладлы деп ешқашан ойлаған емеспін», — дейді чемпион.

ҚазАқпарат