Өмірді сақтандыру компаниялары келісімшарт сыйақысының бір бөлігін қызметкерлерді еңбек қауіпсіздігіне оқытуға, ұжымдық және жеке қорғау құралдарын сатып алуға жұмсау керек. Үкімет отырысында Премьер-Министр Әлихан Смайылов осындай пікір білдірді.
«Көптеген елде өмірді сақтандыру компаниялары сақтандыру сыйлықақысының белгілі бір бөлігін превентивті іс-шараларға бағыттайды. Яғни, оларда қызметкерлерді еңбек қауіпсіздігіне оқытуға, ұжымдық және жеке қорғау құралдарын сатып алуға басымдық беріледі. Біз де осындай жүйеге көшуіміз керек», — деді Үкімет басшысы.
Ә.Смайылов 2030 жылға дейінгі Қауіпсіз еңбек тұжырымдамасы салада қалыптасқан проблемаларды кезек күттірмей шешу үшін әзірленгенін еске салды.
«Бұл құжат ең алдымен кәсіптік қауіп-қатерлер мен өндірістік жарақаттану деңгейін және кәсіптік ауру түрлерін төмендетуге бағытталған. Барлық тәуекел алдын-ала ескерілетін болады. Өндірістегі қауіпсіздік саласын цифрландыру осы мәселелерді шешуге ықпал етуі тиіс», — деді ол.
JQ-Aqparat