Алаяқтық жолмен несие рәсімдеген қылмыстық топ ұсталды

Полиция азаматтардың атына алаяқтықпен несие рәсімдеген қылмыстық топты ұстады.

Polisia.kz. мәліметінше,  26 қарашада Ақмола облыстық полиция департаменті өңір прокуратурасының бастамасымен жедел-іздестіру іс-шараларының нәтижесінде ақмолалық азаматтардың атына екінші деңгейдегі банктерден несие ресімдеумен айналысқан ұйымдасқан қылмыстық топты әшкереледі. Ұйымдасқан қылмысқа қарсы күрес басқармасының қызметкерлері ұстау шарасын Көкшетау және Алматы қалаларында өткізді. Барлығы жедел қызметкерлер қылмыстық топтың 5 мүшесін ұстап,  уақытша ұстау изоляторына қамады. Жедел уәкілдердің айтуынша, бірнеше ай бойы төрт ақмолалық пен оңтүстік астананың тұрғыны негізінен ауылдық жерлерден адамдарды тауып, алдау жолымен олардың атына ірі көлемде несие рәсімдеген.  Оған қоса, жәбірленушілерді Алматы қаласына әкетіп, жылдам табыс табуға уәде берген. Бүгінгі күні топтың қылмыстық әрекетінен 7 адамның зардап шеккені  белгілі болды. Құрбандардың нақты саны анықталып жатыр.

Құқық қорғау органдарының қызметкерлері тінту кезінде қағаз ақша, травматикалық және суық қару, телефондарды, флэш-карталарды және банктік келісімдерді тауып, тәркіледі. Ұйымдасқан қылмыстық топтың құрамында жасалған алаяқтық фактісі бойынша сотқа дейінгі тергеп-тексеру жүргізіліп жатыр. Барлық бес қатысушы ұсталып, уақытша ұстау изоляторына қамалды. Тергеп-тексеру аясында полиция қызметкерлері жәбірленуші азаматтардың санын және залалдың жалпы сомасын анықталуда.
JQ-Aqparat
Сурет: Polisia.kz