Ақтөбеде іздеу жарияланған полиция қызметкері Марат Баевқа қатысты қылмыстық іс тергеліп, сотқа жіберілді, деп хабарлайды ҚазАқпарат. Ақтөбе бұрынғы полиция қызметкеріне іздеу жариялады. Бұған дейін хабарлағанымыздай, Мемлекеттік қызмет істері және сыбайлас жемқорлыққа қарсы іс-қимыл агенттігінің Ақтөбе облысы бойынша департаменті 42 жастағы Марат Баев туралы кез келген ақпаратқа сыйақы тағайындаған болатын.
Ал бүгін Ақтөбе облысы прокуратурасының аппарат жетекшісі Жасұлан Дәулембаев істің сотқа жіберілгенін хабарлады. «Өкілеттілігін асыра пайдаланған Ақтөбе облыстық ІІД Ұйымдасқан қылмысқа қарсы күрес басқармасының қызметкерлеріне қатысты қылмыстық іс сотқа жіберілді. Ұйымдасқан қылмысқа қарсы күрес басқармасының 5 қызметкеріне «заңсыз балық тасымалдаған күдіктілерді анықтап, қылмыстық жауапкершіліктен босату үшін ақша бопсалап, тәркілеген өнімді басқа адамдарға сатып жіберді» деген айып тағылды. Айыпталушылар арасында Ұйымдасқан қылмысқа қарсы күрес басқармасы бастығының орынбасары, екі бөлім бастығы мен бірнеше полиция қызметкері бар. Күдіктілердің үшеуі уақытша тергеу изоляторында отыр, біреуі үйқамақта. Біреуі тергеу кезінде қашып кетіп, іздеу жарияланды. Бұл туралы Мемлекеттік қызмет істері және сыбайлас жемқорлыққа қарсы іс-қимыл агенттігінің Ақтөбе облысы бойынша департаменті хабарлады»,- деді Ақтөбе облысы прокуратурасының аппарат жетекшісі Жасұлан Дәулембаев.
WhatsApp: +7 705 717 9113
