Ақтөбеде қайтыс болғандар үй кезегінде тұрған

Ақтөбе облысының прокуратурасы тұрғын үй алу кезегін уақтылы түгендеу бойынша жергілікті атқарушы органдардың қызметіне талдау жүргізді.
Облыста 36 мыңнан астам адам кезекте тұр. Оның ішінде көп балалы отбасылар, жетім балалар мен халықтың әлеуметтік осал топтарына жататындар бар.
Басқа елді мекенге тұрақты тұруға кеткен, еңбек қатынастары тоқтатылған және тұрғын үйді жекешелендіріп үлгерген 100-ден астам азамат баспанаға мұқтаждардың дерекқорынан шығарылмаған.
Баспанаға мұқтаж азаматтардың тізімінде о дүниелік 11 азамат кезекте тұрған.
Талдау нәтижесінде коммуналдық тұрғын үй қорынан тұрғын үйге мұқтаж азаматтардың кезектегі тізімдерін түгендеу жұмыстары жергілікті атқарушы органдар тарапынан дұрыс жүргізілмегені анықталды.
Осы деректер бойынша прокурорлық қадағалау актісі енгізіліп, заң бұзушылықтар жойылды.

JQ-Aqparat