Ақтөбе: Темір ауданында су тасқынынан келген шығынды анықтау үшін комиссия құрылды

Ақтөбе облысының Темір ауданында су тасқыны келтірген материалдық шығын көлемін анықтау мақсатында арнайы комиссия жасақталды.

Облыс әкімі Асхат Шахаров Темір ауданында су басқан Шұбарқұдық ауылына барды. Өңір басшысы төтенше жағдайлар вице-министрі Ерлан Нұрпейісов, департамент басшысы Нұрғали Жүнісовпен бірге ауылды аралап, ахуалмен танысты.

Қазіргі уақытта ауылда су деңгейі түскенімен, жаңбыр жауып тұр. Аудандық су тасқынына қарсы штаб мәліметінше, 5 үйге су кірген, 7 көшені және 34 ауланы су басқан.

Ахуалды тұрақтандыру үшін әскери қызметшілермен қосқанда, 200-ден астам адам мен 34 техника жұмыс істеп жатыр. Су айдау жұмысы мен ағыстың бағытын бұру, бөгеу ісі қарқынды.

Сондай-ақ  көмекке Маңғыстау облыстық төтенше жағдайлар департаментінің 52 қызметкері келді. 5 бірлік техника және 8 су соратын мотопомпа жеткізілді.

Өңір басшысы тұрғындармен кездескенде арнайы комиссия жұмыс істеп бастағанын, төтенше жағдай жарияланбаса да, үйлеріне зақым келген тұрғындарға жан-жақты көмек көрсетілетінін жеткізді.

JQ-Aqparat

Суреттер: Ақтөбе облысы әкімінің баспасөз қызметі