Ақмола облысының қылмыстық істер жөніндегі мамандандырылған ауданаралық соты азық-түлік дүкендерінің 2 иесін апиын мен кептірілген көкнәр сабанының тұқымын сатқаны үшін 10 жылға бас бостандығынан айырды. Бұл туралы Ақмола облысының прокуратурасы мәлімдеді.
Дүкен иелері көкнәр тұқымын Көкшетау қаласының есірткіге тәуелді тұлғаларына әр келісін 10 мың теңгеден сатқан.
Екі дүкенді тінту барысында 50-ден астам қап көкнәр, 500-ден астам химиялық сұйықтық бөтелкелері және 1 мыңнан астам медициналық шприцтер, есірткі саудасынан алынған ақша аударымдары тіркелген кассалық журналдар тәркіленді.
Ақшалай есептегенде тәркіленген өнім 30 миллион теңгеге бағаланады.
Қылмыстық істе қатысушы прокурордың өтініші бойынша қылмыстық жолмен алынған 1 млн теңгеден астам ақша тәркіленді. Осыған байланысты Ақмола облысының прокуратурасы азаматтарды азық-түлік көкнәрінің үлкен көлемде сату фактілерін анықтаған жағдайда, құқық қорғау органдарына хабарлауға шақырады.
JQ-Aqparat