Аида Балаева: Президент алдымызға жаңа қоғамдық этиканы қалыптастыру, «Әділетті Қазақстан» құру міндетін қойып отыр

Мәдениет және ақпарат министрлігі Азаматтық қоғамды дамытудың 2030 жылға дейінгі тұжырымдамасын іске асыру бойынша бірқатар жүйелі шаралар қабылдауда. Олардың қатарында дамудың институционалдық негіздерін құру, өзара іс-қимылдың диалогтық форматын құру, үкіметтік емес сектор мен волонтерлер қоғамдастығын өзекті мәселелерді шешуге тарту жүйесін жетілдіру бар.
Бұл туралы мәдениет және ақпарат министрі Аида Балаева Орталық коммуникациялар қызметінің алаңында өткен брифинг барысында баяндады.
«Бірінші бағыт бойынша Мемлекет басшысының тапсырмасы аясында «Қоғамдық бақылау туралы» жаңа заң және оған ілеспе заң қабылданды. Олар қоғаммен қатар талқыланып, сарапталып дайындалды. Заңдарда субъектілер мен объектілердің базалық қағидалары мен қағидаттары, құқықтары мен міндеттері, қоғамдық бақылау нысандары айқындалған. Алғаш рет заңнамалық деңгейде петиция институты енгізілді. Оған қоса, 21 желтоқсанда азаматтардың бірлестіктер құрудағы еркіндік құқықтарын кеңейтуге бағытталған «Қоғамдық бірлестіктер туралы» заңға өзгерістер енгізу туралы ҚР Заңына қол қойылды»,- деді министр.
Қоғамдық кеңестердің қызметін қайта форматтау бойынша қарқынды жұмыс жүргізілді. Олардың құрамындағы азаматтық сектордың өкілдігі 23,5 пайызға өсіп, 86 пайызды құрап отыр. Кеңестердегі жастардың үлесі 10 пайызға дейін өсті.
Министрлік волонтерлер қозғалысын белсенді дамытуда. 2020 жылдан бастап республикалық және өңірлік фронт-офистер жұмыс істейді. Ауқымды жұмыс нәтижесінде волонтерлер ұйымдарының саны 3 есе, белсенді волонтерлер саны – 5 есе артты.
Үкіметтік емес ұйымдармен өзара іс-қимылдың әртүрлі диалогтық форматтары қамтамасыз етілуде.
«Осындай алаңдардың бірі – 2023 жылдан бері жүйелі негізде жұмыс істеп келе жатқан Қазақстанның Азаматтық форумының платформасы. Маңызды диалог алаңы – Ұлттық құрылтай. Құрылтайдың екінші отырысында Мемлекет басшысы жаңа қоғамдық этиканы қалыптастыру, «Әділетті Қазақстан» құру, сондай-ақ «Адал азамат» қалыптастыру жөнінде нақты тапсырмалар берді. Осы міндеттерді шешу үшін біз жұмыс істеп жатырмыз», — деп түйіндеді министр.

JQ-Aqparat

Сурет: Мәдениет және ақпарат министрлігі