Мәдениет және ақпарат министрі Аида Балаева «Қазақфильм» төңірегіндегі жағдайларға қатысты мәлімдеме жасады. Ол пікірін Facebook-тегі парақшасында жариялаған. Министр киностудияның айналасында болып жатқан мәселелерден хабардар екенін айтты.
«Шынында да, қазір біз айналысып жатқан жүйелі мәселелер бар. Осыған байланысты ұйымдастыру және заңнамалық шаралар қабылданатын болады. Аты аңызға айналған «Қазақфильмнің» бұрынғы даңқы көп ұзамай оралатынына сенімдімін. Алдағы уақытта сапалы фильмдер түсіріп, көрерменді қуанта береді деп ойлаймыз», – деп жазды Аида Балаева.
Еске салайық, Шәкен Айманов атындағы киностудияда күні кеше ғана шу шыққан болатын. Актер Қуандық Дүйсенбаев «Қазақфильмнің» аумағы жүзге жуық қытай көлігінің тұрағына айналғанын айтып, базынасын жеткізген. Одан бөлек, қызметкерлердің 30 пайызы ақысыз демалысқа жіберілгенін жайып салды.
«Қазақфильм» АҚ президенті Азамат Сатыбалды расымен ғимаратты жалға бергенін, қаржыдан қысылғандықтан қызметкерлерін демалысқа жібергенін растады. Тығырықтан шығудың бір жолы деп таксопаркпен келісім-шартқа отырыпты. Алайда киностудия бюджетіне қанша ақша түсетінін айтпады.
JQ-Aqparat