Жезқазғанда 223 млн теңгеден астам бюджет қаражатын негізсіз жұмсауға итермелегендер анықталды. Ұлытау облысының прокуратурасы Жезқазған қаласының жылу желілерін қайта құру және жаңғырту кезінде бюджет қаражатын аса ірі мөлшерде талан-таражға салу фактісін анықтады.
Прокурорлар Жезқазған қаласының тұрғын үй коммуналдық шаруашылығы, жолаушылар көлігі және автокөлік жолдары бөлімінің (ТКШ бөлімі) қызметін тексерген. Нәтижесінде Жезқазған қаласының жылу желілерін қайта құру және жаңғырту кезінде бюджет қаражатын аса ірі мөлшерде талан-таражға салу фактісі анықталды.
Атап айтқанда, 2021 жылы ТКШ бөлімінің лауазымды тұлғалары құрылысты жоғары бағамен қабылдаған. Бұл дегеніміз 223 млн теңгеден астам мөлшерде бюджет қаражатын негізсіз артық төлеуге әкелген.
«Аталған факт бойынша облыс прокуратурасы Қылмыстық кодекстің 189-бабы (Сенiп тапсырылған бөтен мүлiктi иемденiп алу немесе талан-таражға салу) бойынша сотқа дейінгі іс жүргізуді бастап, оны тергеп-тексеру Ұлытау облысы бойынша Сыбайлас жемқорлыққа қарсы іс-қимыл агенттігінің департаментіне тапсырылды. Қылмыстық істі тергеп-тексеру барысы облыс прокуратурасының бақылауына алынды», — делінген Ұлытау облысы прокуратурасының мәлімдемесінде.
JQ-Aqparat