1 қаңтардан бастап оң рульді машиналар такси бола алмайды (Видео)

20 тамыз 2024, 13:02

Елімізде оң рульді машиналармен жолаушы тасымалдауға тыйым салынбақшы. Бүгін Үкімет отырысынан кейінгі баспасөз мәслихатында көлік министрі Марат Қарабаев осылай деді.

Оның айтуынша, 1 қаңтарға дейін такси агрегаторлары көлік құралдарын тексеріп, оң рульді машиналарды такси ретінде тіркеуден бас тартады.

«Сондай-ақ елімізде рулі оң жақтан сол жаққа ауыстырылған машиналар бар. Олар да адам өміріне қауіп төндіреді. Сондықтан 1 қаңтарға дейін Индрайвер мен Яндекс ондай көліктерді анықтап, тіркеуден алып тастауы тиіс», — деді министр.

Оған қоса, ішкі істер министрлігі жол-көлік ережесін жиі бұзатын жүргізушілердің тізімін жасайды. Олар да такси қызметін көрсетуден аластатылады. Марат Қарабаевтың айтуынша, мұның бәрі азаматтардың қауіпсіздігін қамтамасыз ету үшін керек.
Көлік министрлігінің мұндай қатаң шараларды қолға алуына өткен демалыста Жамбыл облысында болған жойқын жол-көлік апаты түрткі болғаны белгілі. Бірақ осындай қатаң шара қабылдау үшін міндетті түрде адам өлімі болуы керек пе?