Жұмыс іздеу жеңілдетілді

Соңғы екі айда Астанада www.enbek.kz порталы арқылы 206 жұмыс беруші 1193 бос жұмыс орындарын ұсынды. Бүл туралы Астана қаласы әкімдігінің медиа орталығы хабарлайды. 

Астана қаласының жұмыспен қамту, еңбек және әлеуметтік қорғау басқармасының басшысы Ермек Оспановтың мәліметінше, Астана қаласының Халықты жұмыспен қамту орталығы қыркүйек айынан жаңа форматта жұмыс істей бастады. Е.Оспанов «Негізгі өзгерістердің бірі ол HR — қызметі тұрғысынан жұмыс берушілерге қажетті мамандарды сапалы түрде таңдау болып табылады. Яғни, егер бұрын Жұмыспен қамту орталығы жұмыс орындарын іздесе, қазір жұмыс берушілерге қажетті мамандар іздейміз», — деді . Сондай-ақ енді жұмыс берушілерге бос жұмыс орындары туралы мәліметті беру үшін Халықты жұмыспен қамту орталығына келіп жүрудің қажеті жоқ. «Ол үшін www.enbek.kz порталына тіркеліп, жеке кабинет ашып, өзінде бар бос жұмыс орындары туралы мәліметті көрсете алады, ал жұмыс іздеушілер осы порталда электрондық түйіндемелерін толтырып, бос жұмыс орындарын қарай алады», — деді басқарма басшысы.

Айдос Құсайынұлы