«Жамандыққа қимағаным рас…»Ләйлә Сұлтанқызы сот үкіміне қатысты пікір білдірді

Белгілі журналист және тележүргізуші Ләйлә Сұлтанқызы әнші Алмас Кішкенбаевтың сот үкіміне қатысты өз пікірін білдірді. Ол бұл жаңалықты алғаш естігенде сенбей, жала шығар деп ойлағанын жасырмады.

«Сот Алмасты кінәлі деп тауыпты. Ол есімде жоқ деген көрінеді. 15 күн әкімшілік қамауға алынды. Жала шығар деп ойлағаным да рас. Кәмелетке толмаған балаға қатысты кез келген бұрыс әрекеттерді ешқалай ақтауға болмайды! Мас күйінде болу – ешқандай сылтау емес. Заң барлығына бірдей!» – деп жазды Ләйлә Сұлтанқызы өзінің телеграм парақшасында.
Тележүргізуші соңғы күндері көптеген БАҚ өкілдері мен достарының Алмас Кішкенбаевтың байланыс нөмірін сұрап, хабарласқанын да айтты. Ол өзінде бар нөмірлерді беріп, әншімен соңғы рет өткен жылдың жазында сөйлескенін атап өтті.
«Алмасқа соншалық не болды екен?» – деп, Ләйлә Сұлтанқызы өз таңданысын жасырмады.

Фото: @sultankyzy