Ұялы телефон сатқандардың қолынан ұрланған зат табылды

Ақтөбедегі «Астана» сауда үйінің маңында телефон сатып алып, сатып жүргендерден ұрланған ұялы телефон табылды, – деп хабарлайды Aktobenews.kz тілшісі.

Ақтөбеде рейдтік шара өтіп, телефон сатып алып, сатып жүргендер полиция бөліміне жеткізілген болатын. Әлеуметтік желі арқылы тікелей таратылған рейд халық арасында түрлі ой туғызды. Алғашында Ақтөбе облыстық ІІД ұрланған заттар табылмағанын хабарлаған болатын. Ал прокуратура ұрланған телефонның бар екенін анықтады.

«Рейдтік шаралар барысында ұялы телефондар ұрлығының алдын алу көзделді. Бір сатушыдан криминалдық есепте тұрған телефон табылды. «Samsung Galaxy A3» маркалы ұялы телефоны ұрланған заттай дәлелдеме ретінде анықталды және ол алынды», — деп хабарлады Ақтөбе облысы прокуратурасының баспасөз қызметі.

Прокуратураның деректеріне сүйенсек, «Ұрлыққа тосқауыл» жобасын іске асырылып жатыр. Жыл басынан бері ұялы телефон ұрлығы 47%, мал ұрлығы 16,5%, автокөлік ұрлығы 38,5%, пәтер тонау жайттары 21,7%-ға азайды.