Ұсталған қырғыз депутаты Қазақстан азаматы болып шықты

Қазақстанда ұсталған Қырғыз Республикасы Жогорку Кенеш депутаты Дәмірбек Асылбекуулу қазақстандық болып шықты. Бұл туралы ҚР ІІМ Мемлекеттік тіл және ақпарат департаменті директоры Алмас Сәдубаевтің Tengrinews.kz тілшісі жолдаған сауалға берген жауабында айтылады.

ІІМ өкілінің айтуынша, ер адам — Жамбыл облысы Қордай ауданының тумасы, ұлты қазақ. Кәмелет жасына толған кезде туу туралы куәлігінің негізінде ҚР аумағы азаматына берілетін жеке куәлік пен паспорт берілген. 2010 жылы құжаттарының мерзімі аяқталуына байланысты қайтадан Қазақстан Республикасы азаматы ретінде құжат алған. «Уәкілетті органдарға Қазақстан Республикасы азаматтығынан шығу туралы өтініш бермеген. Қазіргі уақытта осы дерек бойынша қызметтік тексеріс жүріп жатыр», — деп хабарлады Алмас Сәдубаев.