Ұрлаған жылқыны жатын бөлмеге жасырған (Видео)

Ақмола облысында ауылдасының жылқысын ұрлаған азамат жануарды үйіне жасырған. Биені қонақ бөлмеге қамап, өзі жатын бөлмесінде қалың ұйқыға кеткен күдіктіні түн ішінде полиция әрең оятып алды. Бұл туралы КТК телеарнасы хабарлады.

— Сендер не істеп жатырсыңдар, түсінбей тұрмын.

— Мынау сенің үйіңде анау жылқы неғып тұр?

— Құран ұстайын, нан ұстайын, білмеймін, түнімен іштім, жаттым.

Арақ ішіп удай мас болдым деген Петровка ауылының тұрғыны төр бөлмеге жылқының қалай кіріп кеткенін білмеймін деп ант-су ішіп тұр. Үш бас мал қамауда тұрған жерінен ізім-ғайым жоғалыпты. Қораны тексеріп шыққаннан кейін иісшіл ит үйге қарай бет алған. Мал иесімен бірге полицейлер келіп кіргенде залда тұрған биені көріп, өз көзіне сенбепті. Ал жылқы ұрлады деген күдікті шырт ұйқыда жатқан. Олардың көзі бірден киімшең ұйықтап жатқан үй иесінің бәтеңкесіне түскен. Аяқ киімге малдың қиы жабысқан екен.

Гүлнәр Пинчук, Ақмола облысы ПД баспасөз қызметінің жетекшісі:

— Бие жабағысы және байтал жоғалған. Мал иесі Астрахань ауданының полиция бөліміне хабарлаған. Жоғалған малдың біреуін күдікті үйіне кіргізген, басқа екеуін далаға айдап жіберген. Қазір жылқылар иесіне қайтарылды. Мал ұрлығы бойынша сотқа дейінгі тергеу басталды.