Баспана мен көлік сатып алушы бұрынғыдай ақшасын долларға айырбастап, ары-бері шапқыламайды. Сауда-саттығын өзіміздің теңгемен жүргізеді. Осыдан-ақ жұрттың ұлттық валютаға деген сенімі артқанын байқаймыз. Демек, долларсыздандыру саясаты іске асты. Ел Тәуелсіздігінің ширек ғасырлық мерейтойы қарсаңында төл теңгеміз айналымға енгізілген күн айтулы да айшықты оқиғамен есте қалды. Елордада «Қазақстан Тәуелсіздігіне 25 жыл: ұлттық валюта» деген тақырыппен конференция өтті.
Алқалы жиында Ұлттық банк Мемлекет басшысының бейнесі бедерленген жаңа банкнот пен Тәуелсіздіктің 25 жылдығына арналған естелік монетаны жұртшылық назарына ұсынды. Жиында сөз алған Мемлекеттік хатшы Гүлшара Әбдіхалықова Мемлекеттік туымыз, Әнұранымыз, Елтаңбамызбен қатар, мемлекеттің төл валютасының болуы Тәуелсіздіктің ең басты белгілерінің бірі екенін атап өтті. Ол 1993 жылы 15 қарашада Қазақстан өз валютасы – теңгені айналымға енгізіп, үлкен тарихи қадам жасағанына тоқталды. Г. Әбдіхалықова сол кезде экономика тоқырап, өндіріс орындары жабылған, тіпті қарапайым адамдардың жалақысына дейін сыртқы факторларға тәуелді болғанын еске алды. «Елбасы Н.Назарбаевтың сындарлы саясатының арқасында еліміз уақыт сынынан сүрінбей өтті. Ал төл теңгеміз Тәуелсіздіктің айшықты символдарының біріне айналды. Халықтың көңіліне сенім ұялатып, болашаққа нық қадам басуына жол ашты. Әлемдік дағдарысқа лайықты төтеп беріп, мызғымас қуатын дәлелдеді, – деді Мемлекеттік хатшы.
Ұлттық банк төрағасы Данияр Ақышев Елбасы ұсынған «Мәңгілік Ел» идеясының мызғымас негіздерінің бірі – ұлттық бірлік, бейбітшілік және келісім екенін айта келе, көпшілікке таныстырылған естелік монетаға осы идея негіз болғанын атап өтті. Бас банкир «Баршамыздың Отанымыз бір, тағдырымыз бір. Тәуелсіздік тарихы – Мемлекет басшысының тарихымен тығыз байланысты. Сол себеп-ті, Ұлттық банк Тәуелсіздіктің 25 жылдығына арналған, еліміздің дамуына Президенттің қосқан үлесін бейнелейтін мерейтойлық банкнотты назарларыңызға ұсынады» – деді.
Данияр Ақышев, Тәуелсіздік жылдары Қазақстан жеткен жетістіктер мен бағындырған биіктер Елбасы Нұрсұлтан Назарбаевтың есімімен ажырамас байланыста екеніне тоқталды. Ол осыған былай деді: «Тұңғыш Президенттің еліміздің тарихындағы рөлі мен маңызын қарапайым өмір құндылықтарымен өлшеу мүмкін емес. Еліміздің тарихи жетістіктерінің алтын парағы болашағымыз әлі айқындала қоймаған қиын кезеңде жазылды. Сол уақытта қабылданған шешімдер тарихи ауқымы жағынан да, ел халқының тағдырына ықпалы бойынша да бұрын-соңды болмаған баға жетпес құндылыққа ие екендігін уақыттың өзі дәлелдеді».
Д. Ақышев атап өткендей, теңге – еліміздің қаржылық тәуелсіздігінің символы. Төл валютамыз дамудың жаңа деңгейіне жол ашып, жаңа нарықтық экономиканың құрылымдарын қалыптастыруды қамтамасыз ете алды. Төл валютамыз ғана тәуелсіз экономикалық және қаржы-несиелік саясатты жүзеге асыруымызға, нақты эконо-микалық егемендікке қол жеткізуімізге мүмкіндік туғызды. Ол, сондай-ақ банкнотқа портрет салу тәжірибесі әлемде кең қолданылатынын, Нельсон Мандела, Мұстафа Кемал Ататүрік, Ли Куан Ю, Уинстон Черчиль және басқа да әлемдік деңгейдегі көшбасшылардың бейнесі өз елдерінің заманауи қағаз ақшасында бейнеленгенін атап өтті.
Талап Тілеген