Алматы ТЖД таудағы сел қаупіне қатысты шұғыл хабарлама жариялады.
Ауа райы болжамы бойынша, ертең, яғни 28 шілдеде Алматы мен оған іргелес таулы жерлерде кейде қатты жаңбыр, найзағай, бұршақ жауады деп күтілуде.
Соңғы 13 күнде қалыптасқан ауа температурасының жоғарылауына байланысты, Алматы тауларында гляциалды (мұздық) және нөсерлі сипаттағы сел қаупінің жоғары дәрежесі байқалады. Гидрометеорологиялық және сел жағдайының талдауына сәйкес, қатты жаңбыр жауған кезде сел жүруі мүмкін», — делінген Алматы қаласы ТЖД баспасөз хабарламасында.
ТЖ министрінің нұсқауына сәйкес Алматы қаласында орналасқан құтқару бөлімшелері жоғары дайындық режиміне келтірілді. Ал әкімнің міндетін атқарушының өкімімен қалалық азаматтық қорғау қызметтері, аудандық әкімдіктер, азаматтық қорғау қызметтерінің авариялық-құтқару, инженерлік техникасы дайындыққа келтірілді.
«Қазселденқорғау» бөлімшелері сел қаупі бар учаскелерде бақылаудың жеделдетілген режиміне ауыстырылып, аэровизуалды және жергілікті бақылау жүргізілуде. Инженерлік-техникалық қызметкерлердің тәулік бойы кезекшілігі ұйымдастырылды.
Қалалық ТЖД: «Құрметті туристер, Алматы қаласының тұрғындары мен қонақтары! Сел тасқынына қалып қойған жағдайда құтқарылуға мүмкіндік жоқ. Сел тасқыны қаупіне байланысты Іле Алатау тауларына бармауды сұраймыз, — деп ескертіп жатыр.
JQ-Aqparat