Актер Марат Көккөзов десе, көпшіліктің көз алдына тақия киіп жүрген ер адам елестейді. Бұл – кездейсоқтық емес. Өнер иесі осы бас киімді отыз жылдан бері тастаған емес.
“Тақияны 1994 жылы Маңғыстауға бас құда болып барғанда кидім. Сол кезден бастап, ұлттық бас киімді күнделікті өмірімнің ажырамас бөлігіне айналдырдым. Өзім үйдің кенжесімін, кигеніме мақтанамын. Тақия – қазақы болмысымды айшықтайтын белгі. Шетелге шыққанда да оны тастамаймын. Көпшілік қызығып қарайды, сұрайды. Бұл – мен үшін ұлттық мәдениетімді насихаттаудың бір жолы”, – дейді актер.
Өнер иесінің пайымынша, бас киім – жай ғана аксессуар емес, адамның ішкі мәдениетінің көрсеткіші.
“Әйел адамның да, ер адамның да басы жабық болғаны дұрыс. Тақия – кәдімгі үй сияқты: басыңды қорғайды, жинақылық береді. Оның үстіне, тақиямен жүргенде ойың да сергек болады”, – деп пікір білдірді ол.
Марат Көккөзов ұлттық киімге деген құрмет әрбір қазақтың бойында болуы керек деп есептейді. “Өз дәстүрімізді ұмытпай, оны күнделікті өмірімізде дәріптесек, бұл – нағыз мәдени мұраға деген құрмет”, – дейді ол.
Олжас Әбдіхалық