Түркия Трамптан Гүленді шұғыл түрде экстрадициялауды сұрады

Түркияның премьер-министрі Бинали Йылдырым Дональд Трампты президент қызметіне келуімен құттықтап, екі елдің қарым-қатынасының саясатын қайта қарайды деп сенетінін айтып өтті деп хабарлайды tengrinews.kz.

«Жаңа президенттен 15 шілдеде мемлекеттік төңкеріс жасамақшы болған, қазір АҚШ-та тұрып жатқан Фетхуллах Гүленді шұғыл түрде экстрадициялауды ашық түрде сұраймын», — деп мәлімдеді Йылдырым. Сондай-ақ, ол Түркиядағы мемлекеттік төңкеріс әрекетін жасаған адамды экстрадициялаудың екі елдің қарым-қатынасының жаңа кезеңі болатынын атап өтті.

Еске салайық, Анкара елде биыл 16 шілдеге қараған түні төңкеріс әрекетін жасағандардың басы қасында Фетхуллах Гүлен тұр деп есептейді. Ал сол уақытта АҚШ-тың федерал билігі 2000 жылдан бері Пенсильванияда тұрып жатқан уағызшыны беруден бас тартқан еді.