Сүттің бір литрі — 2812 теңге. Павлодардағы балабақшалардың ақша жасау схемасы әшкереленді

Павлодар қаласының прокуратурасы балабақшалардың азық-түлік өнімдерін жоғары бағамен сатып алу фактілерінің жолын кесті, деп хабарлайды jasqazaq.kz.

Бас прокуратураның мәліметінше, №23 бөбекжай мемлекеттік сатып алу порталында 18 000 литр сүт 50 620 500 теңгеге, яғни литрі 2 812 теңгеден сатып алу туралы хабарландыру жарияланған. Шындығында, майлылығы 2,5% сүттің литрі 345 теңгеден аспайды. Демек №23 бөбекжай-бақшаның литрі 2 812 теңгеге сүт сатып алуы 44 410 500 теңге көлемінде бюджет қаржысын артық және негізсіз жұмсауға себеп болып отыр.

Басқа жағдайда, № 102 бөбекжай жалпы сомасы 19 455 783,6 теңгеге немесе бір кило картопты 1340 теңгеден есептеп, 14 520 кг картоп сатып алмақ болған.
Ал қала дүкендерінде картоп 120 теңге/кг (әлеуметтік баға) және жеке меншік дүкендерде бір килосы 380 теңгеге сатылады.
Тексеруден кейін бұл өнімдерді сатып алуға тыйым салынды. Азық-түлікті сатып алу бағасы төмендетілді, кінәлі тұлғалар жауапқа тартылды.

JQ-Aqparat

Фото: pixabay