Сырттан ақша алатын күмәнды ұйымдардың барлығын тексеру керек!

Кеше Мәжіліс мінберінен Жанарбек Әшімжан жақсы мәселе көтерді. Депутат ЛГБТ ұйымдардың жұмысын тексеріп, мұндай «азғындықты» насихаттауға заңмен тыйым салу керек дейді.

Жалғыз ЛГБТ емес, шетелден қаржы алатын күмәнді ұйымдардың бәрін тексеру керек сияқты. Себебі соңғы жылдары сырттан қаржыландырылатын үкіметтік емес ұйымдар саны артты. Бұл бір жағынан жақсы үрдіс. Қазақстанның сенім кредиті артып, елге қаражат құйылады.

Бірақ батыстың қорлары мен агенттіктер құйған миллиондаған доллар біздің елде қандай мақсатта жұмсалып жатыр? Олар біздің мәдениетіміз бен ұлттық құндылықтарымызға қалай әсер етуде? Міне осы жағын бақылап отыру керек.

USAID, ILGA-Europe, NED, COC Nederland сияқты ұйымдар тек гуманитарлық жобаларға емес, идеологиялық бағыттағы бастамаларға да ақша салады. Олардың басты мүддесі — біздің елді дамыту емес, қоғамға батыстық құндылықтарды сіңіру, ұлттық идентификациямызды өзгерту.

Мысалы, Feminita мен Phoenix сияқты ұйымдар шетелден миллиондар алып, ЛГБТ қозғалысын дамыту, қазақ қоғамының құндылықтарын «ескірген» деп көрсетуге көп күш жұмсаған көрінеді. Мұндай үкіметтік емес ұйымдар ел ішінде өзекті емес мәселелерді жасанды түрде ушықтырып, қоғамды екіге бөлуге тырысады. ЛГБТ мәселелері, әсірефеминистік қозғалыстар мен «гендерлік теңдік» деген ұрандардың астарында батыстық саяси мүдделер жатқаны даусыз.

Енді оны бақылау үшін не істеу керек? ҮЕҰ-лардың қаржылық ашықтығын қамтамасыз ету қажет. Қай ұйым қандай қаражат алып жатыр? Ол қандай мақсатта жұмсалуда деген сұрақтарға нақты жауап алуымыз керек.
Олардың Қазақстанның ішкі ісіне араласуын заңмен шектеу керек деп ойлаймын. Ірі елдер (АҚШ, Қытай, Ресей) өз ішкі саясатына сыртқы күштердің араласуын заңмен қатаң түрде шектеп тастаған. Қазақстан да ұлттық мүддесін қорғау үшін нақты шаралар қабылдауы тиіс.

Біз батыстың ықпалын шектегіміз келсе, өз идеологиямызды күшейтуіміз керек. Ұлттық құндылықтарды сақтайтын, халықтың бірлігін нығайтатын жобаларға басымдық беруіміз қажет. Бірақ қағазда қалатын жобаларға ақшаны шашуға қарсымын.

Қазақстанның тәуелсіздігі тек экономикалық немесе саяси тұрғыда емес, идеологиялық және ақпараттық тұрғыда да қорғалуы тиіс. Біздің мәдениетіміз, отбасылық құндылықтарымыз, ұлттық болмысымыз сыртқы күштердің қолындағы «эксперименттік платформа» болмауы керек!

Диас Нұрақын, журналист 

P.S. Фото Миланда түсірілген. Еуропадан ақша алуға емес ақша шашуға барған кез)))