Шымкент: Кітап – рухани қолдау құралы

Шымкенттегі әлеуметтік бейімдеу орталығында кітап оқу мәдениеті қалыптасуда

Қиын жағдайға тап болған адамның қоғамға қайта бейімделуіне тек материалдық қолдау жеткіліксіз. Мұндай кезеңде адам жан дүниесінің қалпына келуі мен рухани тірек табуы – аса маңызды. Осы ретте Шымкент қаласы Жұмыспен қамту және әлеуметтік қорғау басқармасына қарасты «Өмірлік қиын жағдайға түскен адамдарды әлеуметтік бейімдеу орталығы» жаңа деңгейдегі маңызды жобаны қолға алып отыр. Бұл – кітап оқу мәдениетін қалыптастыру.

Кітап – оқшауланған адам мен қоғам арасындағы көпір
Орталықта қазіргі таңда 142 қызмет алушы болса, күнделікті онға жуық адам кітапханаға келіп, уақытын мазмұнды өткізуге мүмкіндік алып жүр. Бұл – күнделікті күйзелістен арылуға, ішкі күйзелісті жеңуге, өмірлік құндылықтарды қайта қарауға жол ашатын рухани терапияның бір түрі десе де болады.
Мекеме қызметкерлері кітап оқудың жай ғана уақыт өткізу емес, адамның ішкі әлемін байыту, өзін-өзі тану мен даму үдерісінің бөлшегі екенін жақсы түсінеді. Сондықтан кітапхана қызметімен таныстыру, тақырыптық бағыт таңдау, кітап оқу әдебін үйрету секілді сабақтар жүйелі түрде өткізіліп келеді.

Әдеби қор – әр талғамға сай
Орталықтың шағын кітапханасында бүгінде мыңға жуық кітап жинақталған. Бұл қорда қазақ әдебиетінің алтын қорынан алынған туындылар, орыс әдебиетінің көрнекті классиктері, адамзатқа ортақ әлемдік әдебиет жауһарлары топтастырылған.
Кітаптар жанр мен тақырыптық бағыттар бойынша сұрыпталып, қызмет алушылардың рухани сұранысына сай ұсынылады. Көпшіліктің сұранысына ие – мотивациялық кітаптар, өмірлік дағдыға баулитын психологиялық бағыттағы еңбектер және көркем әдебиет.

Кітап қорын кеңейтуге бағытталған әріптестік
Бүгінде орталық қалалық бірнеше кітапханамен ынтымақтастық орнатып, әдеби қорын кеңейту бағытында келіссөздер жүргізіп жатыр. Бұл бастама – қызмет алушыларға сапалы әдебиет ұсынуға, тақырыптық әртүрлілікке жол ашуға бағытталған маңызды қадам.
Мұндай серіктестік кітап алмасу, әдеби шараларды бірге өткізу, тіпті мобильді кітапхана форматында кеңеюге де жол ашуы мүмкін. Қазақстанның бірқатар өңірлерінде әлеуметтік орталықтар мен кітапханалар арасында дәл осындай тәжірибе оң нәтиже көрсетіп келеді.
Шымкенттегі әлеуметтік бейімдеу орталығының кітап оқу мәдениетін қалыптастыруға бағытталған жұмысы – әлеуметтік қолдаудың жаңа, адами әрі гуманистік үлгісі. Бұл бастама қызмет алушылардың өмір сүру сапасын арттырып қана қоймай, олардың қайтадан қоғамға бейімделуіне, өзін тұлға ретінде сезінуіне үлкен сеп болады.
Кітап – жай қағаз беттеріндегі сөздер жиынтығы емес. Ол – тіршіліктің өзі туралы үнсіз әңгіме. Ал сол әңгімені тыңдай алған жан – өзгеруге, өмірді қайтадан бастауға бір қадам жақындайды.

Бибайша Нұржанқызы, 

Шымкент