Бүгін бір күнге «Шымбұлақ» тау курорты туристер үшін уақытша жабылды.
Демалыс орны әкімшілігінің мәліметінше, сел жүріп жаяу жүргіншілер көпірі мен су алатын құбыр істен шықты.
«21 шілдеде Тұйық-Су Альпі лагерінің маңында Кіші Алматы өзенінде табиғи апат болды – сел жүріп, жаяу жүргіншілер көпірі қирады, су қабылдағыш істен шықты. Соның салдарынан Шымбұлақта су беру тоқтатылды. Біздің мамандар су қабылдағыш станцияны лайдан тазарту жұмыстарын қарқынмен жүргізіп жатыр. Қолайсыздықтар үшін кешірім сұраймыз» деп жазды таур курорты кешенінінң баспасөз қызметі.
Алматы қаласы Төтенше жағдайлар департаментінің өкілдері ауа температурасының жоғарылауынан және мұздықтардың еруіне байланысты Кіші Алматы шатқалының сағасындағы су деңгейі көтеріліп, ластанып, ішуге жарамсыз күйге түскенін растады. Бүгінде Алматы тауларында жағдай тұрақты және Төтенше жағдайлар департаментінің бақылауында. Таудағы көлдерінің тасу қаупі байқалған жоқ.
JQ-Aqparat