Семейде газ баллонын сіріңкемен тексеріп көрмек болған қарт адам алапат жарылыс жасады

Семейде 27 қазан күні кешкілік уақытта газ баллонын сіріңкемен тексермек болған 68 жастағы ер адам жарылыс жасады, – деп хабарлайды Altaynews.kz.

Жалын ас үй жиһаздары, тұрмыс техникасы, есік-терезені жылдам жалмап, мұнан кейін үй шатырының ағаштан жасалған құрылымдарын шарпыған.
Оқиға орнына 3 өрт сөндіру техникасы мен өрт сөндіру және жедел құтқару жасағының 20-дан астам қызметкері келіп жетті.

Өрт аумағы 40 шаршы метрді құрайды. Үй иесі денесінің 10-15%-ын күйік шалған. Жедел жәрдем қызметкерлері зардап шеккен ер адамның жағдайын тексеріп, алғашқы медициналық көмек көрсетті. Алайда ер адам ауруханаға жатудан бас тартқан.