Рухани құндылық: Түркістанда домбыраны дәріптейтін байқаулар өтті

Қазіргі жаһандану заманында рухани құндылықтарды дәріптеу, жас ұрпақты осы бағытта тәрбиелеу – кезек күттірмейтін міндет. Технология шапшаң дамып, әлеуметтік желіде түрлі ақпараттың таралуы жас ұрпақтың ұлттық құндылықтардан қол үзбей өсіп-жетілуін қажет етеді. Осы орайда киелі Түркістан қаласында бұл мәселеге ерекше мән-маңыз берілетінін айту керек.

Елімізде шілде айының алғашқы жексенбісі — Ұлттық Домбыра күні. Атап өтіледі. Бұл — халқымыздың рухани мұрасын дәріптейтін, қадір-қасиетін ұлықтайтын ерекше күн. Өйткені домбыра — жай ғана музыкалық аспап емес, домбыра — ұлттың үні, тарихтың тілі, рухтың жыры.

Ұлттық домбыра күні қарсаңында Түркістан қаласындағы «Достық үйінде» облыстық қоғамдық даму басқармасы «Қоғамдық келісім» КММ-нің ұйымдастыруымен этнос өкілдері арасында Қазақстан халқы Ассамблеясының 30 жылдығы және Ұлттық домбыра күніне орай «Үкілі домбыра» байқауы өтті.
Бұл байқау Қазақстан халқы Ассамблеясының «Елтану» жобасын іске асыру және талантты домбырашыларды анықтау, сондай-ақ облыстың мәдени имиджін көтеруге атсалысу, этнос өкілдеріне ұлттық өнерді насихаттау мақсатында өткізілді.

Байқаудың ашылу салтанатында сөз алған Түркістан облыстық қоғамдық даму басқармасы басшысының орынбасары Нұрсұлтан Сейітжанов іс-шараның маңыздылығына тоқталып, қатысушыларға сәттілік тіледі.

Басқарма басшысының орынбасары: «Үкілі домбыра» байқауы – өнерді ұлықтайтын, рухты оятатын тағылымды шара. Бұл – тек өнер жарысы ғана емес, ұлттық мұраны дәріптеп, оны өскелең ұрпақтың бойына сіңірудің жарқын көрінісі. Қазақтың күй өнері – ғасырлар қойнауынан жеткен асыл қазына. Осы байқау арқылы біз сол қазынаны дәріптеп, жас таланттарға жол ашып отырмыз. Сондай-ақ, бұл жоба Қазақстан халқы Ассамблеясының «Елтану» ғылыми-ағартушылық бастамасымен үндесе отырып, этнос өкілдеріне де қазақ мәдениетінің терең мәні мен әсемдігін танытуға бағытталған. Бұл – бірлік пен рухани келісімді нығайтатын маңызды бастама, — деп атап өтті.

«Дәстүрлі ән орындау», «Күй орындау», «Терме орындау» номинациялары бойынша өткізілген шебер домбырашылар қатысып, бақ сынады.
Сондай-ақ осы Түркістан төрінде қасиетті күй өнерін дәріптейтін республикалық «Күй құдіреті» күйшілер байқауы басталды. Өнер сайысын Түркістан облыстық мәдениет басқармасының басшысы Әзімхан Қойлыбаев ашып беріп, Ұлттық домбыра күнімен құттықтады. Сондай-ақ бұл шараның ұлттық өнерді дәріптеуде маңызды екенін атап өтіп, қатысушыларға сәттілік тіледі.

Еліміздің әр өңірінен келген 23 қатысушы алдымен жеребе тарту рәсіміне қатысты. Олар алғашқы кезеңде Сүгір Әліұлы мен Төлеген Момбековтің таңдаулы шығармаларынан классикалық күй орындайды. Содан соң екінші кезеңде оркестр сүйемелдеуімен жеке домбырамен өнер көрсетеді. Бұл күйшілердің орындаушылық шеберлігімен қатар, сахна мәдениеті мен күйді терең сезіну қабілетін бағалауға бағытталған.

Байқау Түркістандағы «Фараб» әмбебап ғылыми кітапханасының концерттік залында өткізілді.

JQ-Aqparat
Сурет: Түркістан қаласы әкімінің баспасөз қызметі