Президент: Үкімет пен әкімдер жұмысының тиімділігін экономиканың даму көрсеткіштеріне қарай бағалаймыз

Астанада Президент Қасым-Жомарт Тоқаевтың төрағалығымен Үкіметтің кеңейтілген отырысы өтіп жатыр, деп хабарлайды jasqazaq.kz.

Мемлекет басшысы өз сөзінде Үкімет алдында тұрған жаңа міндеттер айқындалатынын атап өтті:
«Бүгін біз Үкіметтің кеңейтілген отырысында өте өзекті мәселелерге тоқталамыз. Себеп — бәрімізге белгілі. Қазір дүние жүзі түбегейлі өзгеріске ұшырап жатыр. Жаһандық үдерістер, ең алдымен, еліміздің экономикалық ахуалына әсерін тигізетіні анық. Жаппай цифрландыру дәуірі, яғни жаңа технологиялық кезең басталды. Күллі әлем мүлдем басқа жағдайда өмір сүреді. Біз соған міндетті түрде дайын болуымыз керек. Жаңа технологиялық ахуалға сақадай сай тұруымыз қажет. Бұл — еліміздің бәсекеге қабілетін арттырып, тұрақты дамуына жол ашатын аса маңызды фактор», — деді.
Қасым-Жомарт Тоқаев Үкімет пен әкімдер жұмысының тиімділігі ең алдымен экономиканың даму көрсеткіштері және азаматтардың тұрмыс сапасына қарай бағаланатынын атап көрсетті.
«Осы жұмыстың нәтижесі былтыр қандай болды? Негізгі міндеттер орындалды ма? Бүгін осы сұрақтарға тоқталамыз және жақын арада шешімін табуға тиіс өзекті мәселелерді талқылаймыз», — деді Мемлекет басшысы.

JQ-Aqparat
Сурет: aqorda.kz