Президент: Саяси реформалар жан-жақты өзгерістер жасауға мүмкіндік берді

Президент Қасым-Жомарт Ұлттық құрылтай отырысындағы сөзін Амал мерекесімен құттықтаудан бастады:
«Ең алдымен бүгін Амал күні баршаңызға құтты болсын дегім келеді.
Қыстан аман-есен шығып, ағайын-бауырмен көрісу – ежелден келе жатқан ата дәстүріміз. Бұл күн – Әз-Наурыздың бастауы. Еліміздің төл мерекесі биыл да қасиетті Ораза айына орайлас келіп отыр.
Қастерлі мейрамдарымыз халқымызды игі амалдар жасауға үндейді. Асыл қасиеттерімізді кеңінен дәріптейді. Құрылтайдың ұлық мерекелермен қатар өтіп жатқаны – жақсылықтың нышаны». Мемлекет басшысы осыдан үш жыл бұрын, наурыз айындағы арнайы Жолдауында алғаш рет Ұлттық құрылтай туралы бастама көтергенін, үш жылдың ішінде еліміз жаңа тұрпатты ел болғанын атап өтті.
«Саяси реформалар жан-жақты өзгерістер жасауға мүмкіндік берді. Жалпыхалықтық референдум арқылы Ата заңға түзетулер енгізілді. Парламенттің құзыры кеңейді, Үкіметтің жауапкершілігі артты. Адам құқықтарын қорғау жүйесі жақсарды. Конституциялық сот құрылды. Шешім қабылдау үдерісіне азаматтардың белсене қатысуына жол ашылды. Басқа да бағыттарда маңызды реформалар жасалды», — деді.
JQ-Aqparat
Сурет: aqorda_resmi