Президент: Неке институтын ер мен әйелдің ерікті одағы ретінде заңнамалық тұрғыда нығайту қажет

Президент Қасым-Жомарт Тоқаев өткен V Ұлттық құрылтайда сөйлеген сөзінде елімізде неке институтын ер мен әйелдің ерікті одағы ретінде заң жүзінде ресми бекіту қажет екенін атап көрсетті деп хабарлайды jasqazaq.kz.

Президенттің айтуынша, мемлекет дәстүрлі мәдени құндылықтарды қорғауға, деструктивті, ашық айтқанда, ұлтымызға жат мінез-құлық үлгілерін насихаттауға қарсы тұруға міндетті.

Мемлекет басшысы: «Біздің қоғамда неке институтын ер мен әйелдің ерікті одағы ретінде, мемлекеттік органда ресми тіркелетін құқықтық норма арқылы заңнамалық тұрғыда нығайту қажет. Алайда сонымен қатар мемлекеттің мораль мәселелеріндегі ресми ұстанымымен келіспейтін көзқарастары үшін ешкімді қылмыстық қудалауға, моральдық кемсітуге жол берілмеуі тиіс. Мемлекеттің ұстанымын мынадай қағидамен түйіндеуге болады: әрбір азаматтың таңдау жасауға құқығы бар, бірақ бұл таңдауды ешкімге күшпен таңуға болмайды», – деді.

Президент мемлекет барлық азаматтардың құқықтары мен бостандықтарын, ар-намысы мен қадір-қасиетін берік қорғайтынын да атап өтті.

JQ-Aqparat
Сурет: aqorda_resmi