Португалиядағы алапат өрттен 41 адам көз жұмды (видео)

Португалияда орман өрті құрбандарының саны артты. Соңғы мәлімет бойынша, 41 адам ажал құшқан. Бұл туралы 24.kz хабарлады.

Тағы 70-тен астам тұрғын жарақат алып, медициналық көмекке жүгінген. Қайғылы оқиғаларға байланысты жергілікті билік 3 күндік аза тұту жариялады. Негізі елде өткен аптаның аяғынан бері орман өрті өршіп тұр. Өйткені күн ыстық. Оған қоса епкінді жел соғып, жағдайды одан бетер ушықтырып отыр. Қазір 500 өрт ошағы тіркелген. Қызыл жалынмен 4 мың маман күресіп жатыр. Көрші Испанияда да ұқсас жағдай. Мұнда да орман өртінен 4 адам көз жұмған. Табиғат апатынан әсіресе елдің солтүстік-батысы қатты жапа шекті. Мұнда 4 мың гектар орман алқабы өртеніп кеткен.