Оралдағы жаңа шағынауданға жол қажет

Оралда жаңадан салынған шағын ауданның тұрғындары жолдың сапасына наразы. Таяуда ғана тапсырылған үйлерге жауын кезінде жету мұң. Әсіресе балаларға қиын. Жеңіл көліктерге де оңай тимейді. Балалардың ойын алаңдары мен көлік тұрақтары да талапқа сай жетілдіруді талап етеді. Жауапты мамандардың айтуынша, қазір асфальт жол салу жұмыстары басталған. Жаңа шағын ауданда тағы бірнеше көпқабатты үй салынады. Осы құрылыс кезінде абаттандыру мәселесіне көңіл бөлінбек.

Жандос Құсайынов, қала тұрғыны:

— Осы Мөңкеұлы, 80/2 үйінің тұрғынымыз. Тұрып жатқанымызға жыл жарым болды. Жол осындай нашар.

Тілекбай Нұроллин, қала тұрғыны:

— Міне, тұрағымыз бар, көріп тұрсыз, бір 10-15 машинаға, басқа жер жоқ. Ал, баланың ойнайтын жері қайда сонда? Кір жаятын жер?

Алмас Пішенбаев, қалалық құрылыс бөлімі басшысының орынбасары:

— Мұрат Мөңкеұлы, 83/2 үйінен шығатын Орал-Атырау және Орал-Саратов тасжолына, сонымен қатар шағынауданішілік жолдарға шығатын жолдың құрылысын қазан айының соңына дейін аяқтау жоспарда. Жаңа-жаңа дамып жатқан шағынаудан болғандықтан, аталған шағынауданда тағы да 10 үйдің құрылысы жоспарланған. Сол 10 үйдің құрылысы басталған кезде балаларға арналған ойын алаңшалары қосымша жоспарға енгізілген.

24.kz