Нұрлан Ноғаев: Дирк мырза, қазақша сөйлесейік!

 Ноғаевқа дән риза болдық. Атыраудың әкімін айтамыз. Күні кеше Голландияның елшісі Дирк Ян Коппты қабылдапты.

365info.kz хабарлағандай, елшіде кінә жоқ негізі. Осында келгелі көргені орыс тілі ғой. Қазақстанды орыстілді ел деп ойлайды. Содан да шығар облыс әкіміне орыс тілінде сұхбаттасуды ұсынған екен. Көрдіңіз бе, қалай? Қазақстанға келген шетелдіктер алдымен орысша үйренеді. Олар мемлекетік тілдің қазақ тілі екенінен хабардар ма екен?

Бірақ Ноғаев жарапты. Орысша сөйлей бастаған елшіні бір ауыз сөзбен бөгеген екен.

«Елші мырза біз де, сіз де Қазақстанда жүрміз ғой. Айталық, мен Голландияға барар болсам, жаныма голланд тілінде сөйлейтін аудармашыны ертіп аламын. Осы себепті де, қазір қазақ тілінде әңгімелесуге мүмкіндігіңіз болмаса, келесіде қазақша сөйлесуге келісейік. Жарай ма?», – депті Нұрлан Ноғаев.
Елші не дейді? Келіскен болар. Келесіде қазақша сөйлейді деп күтейік. Тым болмаса АҚШ-тың елшісінен үлгі алсын, Ресей елшісінен емес…

Елшінің келгендегі мақсаты Атырау облысымен қарым-қатынасты нығайту екен. Әкіммен әрі қарайғы әңгіме осы тақырыпта өрбіпті.