Қазақстан Республикасының Президенті Нұрсұлтан Назарбаев ҚХР Төрағасы Си Цзиньпинге 2016 жылғы қыркүйекте Ханчжоу қаласында өтетін алдағы «G20» саммитіне орай құттықтау жеделхатын жолдады.
«Жаһандық экономика тұрақсыздық пен рецессияға шалынуы тұсында Еліңіз осындай ірі де маңызды шараны қабылдауы қайта жаңғырған Азияның ғана емес, күллі әлем күн тәртібіндегі өзекті мәселелерді шешудегі Қытайдың рөлін халықаралық қоғамдастық кеңінен мойындауының жарқын айғағы екені сөзсіз», — деп атап өтілген Мемлекет басшысының Қытай басшысына жолдауында.
Н.Назарбаев алдағы форум алаңындағы диалог жаһандық экономиканы тұрақтандыруға үлкен серпін беретініне және оның ұзақ мерімді дамуының негізгі бағыттарын айқындайтынына сенімін білдірді.
«Қадірлі досым, Сіздің жеке зейініңіз бен қолдауыңыздың арқасында Қазақстан-Қытай қатынастары тың белестерге көтеріліп, саяси, сауда-экономикалық және мәдени-гуманитарлық салаларда жаңа бастамалар қолға алынғанын ерекше қанағат сезіммен атап өтемін. Бүгінгі таңда елдеріміз үйлесімді көршілестіктің, бейбіт қатар өмір сүрудің және бірін-бірі толықтыратын өзара іс-қимылдың шынайы флагманы ретінде танылды», — делінген жеделхатта.
Мемлекет басшысы Си Цзиньпинге алдағы «G20» саммитіне қатысуға шақырғаны үшін алғыс айтты және Қытай Төрағасын «Көктем мерекесімен» құттықтап, оған мықты денсаулық, табыстар және «қытай арманын» жүзеге асырудағы барлық бастамаларына сәттілік тіледі және Қытай халқының гүлденуіне ізгі тілегін жеткізді.
Дереккөз:ҚазАқпарат агенттігі
WhatsApp: +7 705 717 9113
