Мысырда тұрғын үй салу кезінде ежелгі ғибадатхана табылды

ҚазАқпарат — Құрылысшылар Каир маңындағы Кальюбия провинциясында тұрғын үйдің іргетасын қалап жатып ежелгі мысырлық ғибадатхана қалдығын тауып алды, деп жазады «Йоум7» порталы.

Құрылыс алаңына шақыртылған археологтар ғибадатхананың Гор, Исида және Осирис құдайларына арналып салынған деген болжам жасады. Жер астынан құдайлар бейнесі мен көне мысырлық иероглифтер жазылған ғибадатхана қабырғасының бөлшектері табылды. Құрылыс орны жабылып, археологиялық қазба жұмыстары басталды, деп жазды басылым.

Ғалымдардың айтуынша, жер астында ғибадатхананың ғана емес, тұтас көне қаланың қалдықтары жатуы мүмкін. Табылған ғибадатхананың қай дәуірге тиесілі екені әзірге анықталған жоқ.